Софија, 31 декември 2025 (МИА/БТА) – Еврото не е само економско решение, тоа не е само валута – тоа е знак на припадност: дека вашето место не е на периферијата, туку во простор на заеднички правила, доверба и одговорност; знак дека напорот што сте го вложиле е препознаен и прифатен. Ова го наведува гувернерот на Бугарската народна банка (БНБ), Димитар Радев, во обраќањето по повод претстојното воведување на еврото во Бугарија.

Ова е веста, која денеска ја избра МИА од сервисот на Бугарската телеграфска агенција (БТА), согласно Договорот за размена на информации и професионална соработка, кој предвидува секој ден националните информативни агенции на Северна Македонија и Бугарија да разменуваат по една вест, која ќе ја објават на својот интернет сајт без промени со изрично посочување и цитирање на партнерот како извор.

Бугарскиот лев отсекогаш бил повеќе од пари. Неговото име доаѓа од лавот – симбол што ја придружува бугарската државност со векови, потсетува Радев.

Левот останува дел од нашата историја и сеќавањето на генерации Бугари. Никој не го одзема. Тој едноставно го зазема своето место во приказната за нашата земја – заедно со марките, франците и фунтите на другите европски нации, истакнува тој.

Според него, еврото не ја прекинува оваа приказна, туку ја продолжува.

Бугарските букви, сликите на Мадарскиот коњаник, на Свети Иван Рилски и на Паисиј Хилендарски на европските пари јасно кажуваат: ние не се откажуваме од себеси. Ние изјавуваме кои сме, забележува централниот банкар на Бугарија.

На најновите европски монети пишува „Боже чувај на Бугарија“ и тоа доволно кажува, бидејќи Бугарија е Европа, а Европа е Бугарија, нагласува гувернерот на БНБ.

________________________________________________________________________________________

Медиумската информативна агенција овие текстови ги објавува во оригинална форма, согласно Договорот за размена на информации и професионална соработка меѓу двете национални новински агенции МИА и БТА.