Делчево, 7 мај 2024 (МИА) – Делегацијата на Општина Делчево ја заврши посетата на Луксембург, која на покана на македонски иселеници присуствуваше на Велигденската богослужба која се одржа во православната црква „Св.Никола“, во градот Вил-Ла-Тур (Weiler-la-Tour) во Луксембург.

Во рамки на посетата, која градоначалникот на Делчево Горан Трајковски и советникот за Локален економски развој Тони Стоименовски ја остварија со иселениците, се разговарало за потребите и проблемите кои ги имаат иселениците при нивниот престој во Делчево, претставени биле сработените проекти од страна на општината и идните планови во делот на инфраструктурата.

– Меѓу останатото разговарано е и со заинтересирани сограѓани од Луксембург за можностите за инвестирање во Делчево. Со градоначалникот Трајковски остваривме средба и со амбасадорот на РСМ во Брисел,  на која исто така разговаравме и за потребите и проблемите на Македонците во овој дел од Европа, истакна Стоименовски.

Како што информираше советникот за локален економски развој, иселениците ја истакнале идејата и иницијативата за отварање на здружение кое ќе ја зголеми соработката на дијаспората од Луксембург со Делчево.

Додаде дека во рамки на посетата биле посетени значајни културно-историски знаменитости и институции на Луксембург, а во знак на благодарност за поканата, Трајковски на свештенството при црквата „Св Никола“ доделил пригодни подароци. вс/ра

Фото: МИА