Вашингтон, 30 јануари 2020 (МИА) - Уште еден новинар во САД доби отказ поради погрешно известување за трагичната хеликоптерска несреќа во која животот го загубија НБА-кошаркарот Коби Брајант и неговата 13-годишна ќерка Џиана. Мат Гутман, главен известувач за САД на телевизијата „Еј-би-си њус“, првично во јавување во живо известил дека сите деца на Брајант, Наталија (17 години), Бјанка (три) и Капри (седум месеци) се наоѓале во хеликоптерот. Подоцна тој се коригираше во соопштение на Твитер. - Денеска неточно известив дека се смета оти четирите деца на Коби Брајант летале со него. Тоа е погрешно. Се извинувам до семејството на Коби, пријателите и нашите гледачи, напиша новинарот. По ова тој доби отказ од националната ТВ-мрежа. - Точно известување за фактите е камен-темелник на нашето новинарство. Како што и јави во неделата, известувањето на Мат Гутман првично беше погрешно и не ги исполни нашите уреднички стандарди, изјави претставник на телевизијата. Гутман жали за грешката што ја направил и уште еднаш се извини до семејството на Коби за „предизвиканата болка од загубата и дополнителното страдање предизвикано од прилогот“. Од „Еј-би-си“ не потврдија дали Гутман е привремено суспендиран или добил траен отказ од работа. Во донакаде сличен настан, новинарка на „Вашингтон пост“ исто така беше суспендирана од работа поради тоа што на својот твитер-профил постави линк до прилог на порталот „Дејли бист“ од 2016 година. Во прилогот се говори за кривично дело „силување“ поведено против Брајант во 2003 година. Обвинението беше повлечено. Веднаш по објавениот твит, Сонмез добила повеќе закани кои таа ги репостирала на социјалните мрежи, и поради сето ова новинарката доби привремена суспензија од работа, под сомнеж дека ја нарушила политката за социјални мрежи на медиумот. кб/