Гостивар, 1 април 2025 (МИА) – Во Собранието на Република Северна Македонија, во тек е Јавна расправа за утврдување на предлог листа од пријавените кандидати по Одлуката за објавување јавен оглас за избор на член на Комисијата за спречување и заштита од дискриминација. Пред членовите на Комисија за прашања на изборите и именувањата и претставници на институции и невладини организации досега двајца од осумте пријавени ги образложија нивните кандидатури и одговараа на прашања.

Давид Тасевски, дипломиран психолог и магистер на психолошки науки од Скопје, напомена дека во неговото 12 годишно работење се стекнал со искуство и знаење особено со маргинализираните групи и воочил многу облици на дискриминација. Во одговорите низ дискусијата тој напомена дека дискриминацијата може да влијае врз здравјето и негативно да се одрази врз животот на луѓето. Тој доставувал иницијативи до комисијата и искажа задоволство од досегашната соработка. Смета дека со неговиот избор ќе придонесе во промени на законот за дискриминација и оваа појава да биде казнувана.

Тања Кикерекова, дипломиран правник од Скопје, во образложението пред Комисијата посочи дека има 27 годишно искуство и работела во Министерството за правда во одделот за човекови права и имала значаен придонес во областа.

Во одговорите на прашањата за системската дискриминација и потребата од инклузија, напомна дека е потребно да се направи измена на одредби во законите и деловната способност на лицата со попреченост и да се овозможи физичка пристапност до институциите за да може да ги остваруваат нивните права. Во поглед на родовата еднаквост, таа ќе се залага за примена на препораките од ОН и да се вградат во постапувањето по претставки. На прашање околу подобрување на состојбите со семејното насилство и фемицидот, напомена дека треба да подобри работењето на службите во делот на превенција и во постапките да се испита дали државните службеници имаат одговорност при родово базирано насилство.

По паузата која ја објави претседателот на Комисијата за прашања на изборите и именувањата, Ѓорѓија Сајкоски, образложенија треба да дадат и останатите кандидати: Миле Стојановски, дипломиран правник од с. Миладиновци Општина Илинден, Наташа Амдију, дипломиран правник и магистер на правни науки од Скопје, Вецко Здравески, дипломиран политиколог од Кичево, Весна Марковска, дипломиран правник и магистер по правни науки од Скопје, Горан Нешевски, дипломиран правник од Скопје и Ленче Коцевска, дипломиран правник од Скопје. згм/ев/

ФОТО: МИА