Лондон, 21 август 2024 (МИА) - Челси го ангажираше португалскиот напаѓач Жоао Феликс од Атлетико Мадрид на седумгодишен договор, објави англискиот клуб.

Финансиските детали од договорот не беа откриени, но англиските медиуми објавија дека Челси платил 46 милиони фунти за да обезбеди враќање на Феликс (24) на Стемфорд Бриџ.

Феликс импресионираше за време на неговата прва шестмесечна позајмица во Челси во сезоната 2022/2023, постигнувајќи 4 гола на 20 натпревари. Минатата сезона ја мина на позајмица во Барселона, постигнувајќи 10 гола на 44 натпревари.

Атлетико Мадрид го ангажираше Португалецот од Бенфика во 2019 година, кога постави клупски рекорд од 126 милиони евра. Феликс постигна 34 гола на 131 натпревар за Атлетико и му помогна на тимот да ја освои титулата во Ла Лига во 2021 година.

-Навистина сум среќен што се враќам во Челси и едвај чекам да почнам да играм. Гледам познати лица од последниот пат кога бев тука, што е секогаш убаво, прокоментира Жоао Феликс.

Челси се соочува со швајцарската екипа Сервет во плеј-офот за конференциската лига во четврток, пред да гостува во Вулверхемптон во натпревар од Премиер лигата во недела. дс

Фото: Х/Челси