Киев, 14 ноември 2024 (МИА) - Во периодот од јануари до септември оваа година, хуманитарните организации обезбедија најмалку еден вид помош на 7,2 милиони Украинци, објавија украинските медиуми, повикувајќи се на Министерството за реинтеграција на привремено окупираните територии и Канцеларијата на ОН за координација на хуманитарна помош во Украина.

Се забележува дека 5,8 милиони луѓе, главно од предните области, добија помош во форма на снабдување со вода, санитарни и хигиенски материјали.

Храна и основни потреби им се обезбедени на три милиони луѓе, а два милиони добиле навремена медицинска помош. Околу 1,3 милиони Украинците беа снабдени со материјали за итни поправки на нивните домови.

Организирана е обука за самоодбрана за 1,2 милиони граѓани, а поддржани се 600.000 деца и наставници да го продолжат своето образование.

Во овој период околу 700.000 Украинци добија финансиска помош за различни намени. Обезбедена е поддршка и за речиси 100.000 луѓе кои живеат во привремени центри.

Според податоците на Министерството за реинтеграција, повеќе од 600 организации обезбедуваат помош за Украина во рамките на Планот за хуманитарен одговор за 2024 година.

На 12 ноември, владата додели 17,7 милиони украински гривни (над 400.000 евра) на Министерството за реинтеграција и на централните власти за да се компензираат трошоците направени за сместување на внатрешно раселените лица од март 2022 до јуни 2024 година. мс/

фото: МИА архива