Македонска Каменица, 16 мај 2025 (МИА) - Во согласност со својата трајна определба за поддршка на заедницата, Рудник САСА, преку својата Фондација за одржлив развој, реализираше нов циклус донации во образованието, културата и здравството. Најновите донации, како што информираа од Фондацијата се насочени кон унапредување на условите за учење, зачувување на културното наследство и зајакнување на локалните капацитети во Јавното здравство.

-Во делот на поддршката на образованието, Фондацијата САСА донираше средства за набавка на 50 нови шкафчиња за учениците од прво одделение во ООУ „Св. Кирил и Методиј" во Македонска Каменица, со што како што информираат оттаму дополнително се унапредуваат условите за секојдневен престој на децата во училиштето и се поттикнува развојот на одговорност и организираност кај учениците од најрана возраст, информираа од Фондација САСА.

Фондацијата дополнително донираше и 300 нови книги во градската библиотека „Крсте Петков Мисирков" се до цел збогатување на книжевниот фонд и поттикнување на читачката култура кај сите генерации. 

Благодарение на долгогодишната поддршка од Фондацијата САСА, библиотеката денес располага со над 14.500 изданија наменети за читателите од сите возрасти.

Во рамки на својата поддршка за заштита и афирмација на културното наследство, обезбедени се и нови автентични народни носии за најмладите членови (до 14 години) на културно-уметничкото друштво „Вера Јоциќ“ од Македонска Каменица. 

-Се работи за комплети машки и женски носии од Пијанечкиот регион, кои ќе овозможат автентично претставување на локалното наследство на културни настани во земјата и странство. Заради унапредување на културниот живот во локалната заедница, Фондацијата обезбеди и средства за ставање во функција на Дигиталниот кино-проектор во Домот на културата во Македонска Каменица, со што повторно се овозможува пристап за жителите до филмски и мултимедијални содржини, додадоа од САСА.

Овие донации,  како што подвлекоа се надоврзуваат на најновата поддршка наменета за зајакнување на локалните капацитети за здравствена заштита реализирана неодамна преку донациите за набавка на медицински средства и опрема, која вклучуваше респиратор и монитори за следење на состојбата на пациентите, наменети за општата болница во Кочани и Клиничкиот центар во Штип, а дополнително, беа обезбедени чаршафи и навлаки за пациентите на Клиниката за пластична и реконструктивна хирургија во Скопје.

-Сите ние во Рудник САСА цврсто веруваме дека рударството не значи само бизнис, туку и одговорност за вложување во луѓето, образованието, културата, здравјето и останатите области. кои се значајни за благосостојбата и просперитетот на заедница. Фондацијата САСА е гласот и алатката преку која се реализира ваквата општествено одговорна мисија на рудникот САСА и групацијата САМІ. Охрабрени сме од тоа што поддршката што ја обезбедуваме носи придобивки за луѓето и го подобрува квалитетот на животот во заедницата и токму затоа ќе продолжиме со голема посветеност во оваа насока, вели Ивица Талевски, директор на Фондацијата САСА. вс/дма/

Фото: МИА