Скопје, 8 јануари 2025 (МИА) - Националниот џез оркестар соопшти дека оваа година почнува соработка со академскиот сликар Сергеј Андреевски. Како што најавија од установата, дизајните на плакатите за концертите ќе содржат дела од овој ликовен уметник.

-Оваа година, дизајните на плакатите за концертите на Националниот џез оркестар ќе содржат дела на овој истакнат ликовен уметник со меѓународна кариера. Неговото творештво се движи во границите на постекспресионизмот, а импровизацијата и слободата на изразувањето се едни од главните одлики на џез музиката, па вксрстувањето на нашите сродни сензибилитети веруваме дека неминовно ќе вроди со плод, се вели во соопштението на Националниот џез оркестар.

Сергеј Андреевски (1960, Скопје) дипломирал на Факултетот за ликовни уметности во Скопје во 1985 година.

Андреевски има реализирано над 60 самостојни претставувања ширум светот меѓу кои изложбата „Неизложени дела на хартии,“ Општинска галерија REMEZZO во Каламариа, Солун, Грција; „АЗБУКА“, Народен Музеј „Конак Кнегиње Милице“, Белград, Србија; Имадате, Јапонија - Музеј на современа уметност; изложби во Фетвил (Fayetteville), Северна Каролина, САД - Музеј на модерна уметност; Париз, Франција - Cité des Arts Internationale ; Њујорк, САД - Lincoln Centre, “Cork Gallery at Avery Fisher Hall”; Франкфурт на Мајна - LHB Bank, Gallery “New Europe;” Салзбери (Salisbury), Северна Каролина, САД - “Waterworks Visual Arts Center,” како и бројни изложби во земјава. Бил дел и од над 200 групни претставувања ширум светот.

Основач е на меѓународниот центар за уметност и одржлив развој „Арт поинт – Гумно“, со седиште во селото Слоештица, каде што е и куратор на Меѓународната уметничка резиденција и колонија, што успешно се реализира од 2003 година.

Добитник е на повеќе награди и признанија.

Неговите дела се дел од поставките на државни институции, музеи и приватни колекционери ширум светот.бт/са/

Фото: Национален џез оркестар