Вашингтон, 21 октомври 2024 (МИА) - Американското Министерство за одбрана потврди дека во Израел е испорачан системот за противракетна одбрана THAAD, кој може да пресретнува балистички проектили, пренесува ХРТ.

- Американската војска го пренесе својот напреден противракетен систем во Израел и тој сега е „на место“, изјави денеска министерот за одбрана на САД Лојд Остин.

THAAD, или терминалниот одбранбен систем на висока надморска височина, е критичен дел од слоевитните системи за воздушна одбрана на американската војска, кој ќе помогне на противракетната одбрана на Израел.

- Системот THAAD е поставен, соопшти денеска Остин, зборувајќи со новинарите пред да пристигне во Украина

Во меѓувреме, Тел Авив продолжува со воената операција на југот на Либан.

Секој што е во Бејрут во близина на објектите финансирани од Хезболах, мора веднаш да се оддалечи. Напаѓаме голем број цели. Во наредните денови ќе откриеме како Иран ги финансира терористичките активности на Хезболах преку цивилни институции, добротворни организации и фондации. Тоа е параван за терористички активности, изјави контраадмирал Даниел Хагари, портпарол на Израелските одбранбени сили. ссм/

фото: архива