Психотропни супстанции пронајдени во стан во Скопје, притвор за едно лице
- Јавен обвинител од Основното јавно обвинителство Скопје донел наредба за спроведување истражна постапка против 38-годишен тетовец со непријавено престојувалиште во Скопје, кој е осомничен дека сторил кривично дело неовластено производство и пуштање во промет наркотични дроги, психотропни супстанции и прекурсори од член 215 став 1 од Кривичниот законик.
![Психотропни супстанции пронајдени во стан во Скопје, притвор за едно лице](https://new.mia.mk/images/20240910094334_big_730x400_13.webp )
Скопје, 10 септември 2024 (МИА) - Јавен обвинител од Основното јавно обвинителство Скопје донел наредба за спроведување истражна постапка против 38-годишен тетовец со непријавено престојувалиште во Скопје, кој е осомничен дека сторил кривично дело „неовластено производство и пуштање во промет наркотични дроги, психотропни супстанции и прекурсори“ од член 215 став 1 од Кривичниот законик.
- На 9 септември, по пријава за нарушен јавен ред и мир, полициски службеници дошле во станот на улицата „Миле Поп Јорданов“ во Скопје, каде осомничениот престојувал со неговата девојка. Констатирале прекршок поради расправија на осомничениот со таткото на девојката, а таа на полицајците им предочила дека осомничениот имал некаков вид недозволени супстанции кои ги чува во нивниот дом. Како непосреден држател на станот таа дала согласност службени лица да влезат во домот и да извршат претрес, при што биле пронајдени 501 таблета од 3,4 метилен-диоксиметамфтамин, стимуланс на централниот нервен систем, спакувана во една поголема најлонска кеса, соопштија денеска од Јавното обвинителство на РСМ.
Јавниот обвинител доставил предлог за определување мерка притвор за осомниченото лице, а како причина за побараната притворска мерка се наведени околности што укажуваат на опасност од бегство, оправдан страв дека тој ќе ја попречува истрагата со влијание врз сведоците и вештаците и особени околности кои го оправдуваат стравот дека ќе го повтори кривичното дело.
На осомничениот, како што се наведува во соопштението, му е определен притвор во траење од 30 дена. цр/бак/
Фото: МИА архива