Лондон, 4 октомври 2023 (МИА) - Проширувањето на ЕУ за да вклучи девет нови земји, вклучително и Украина, би ги чинeло постоечките членки повеќе од 256 милијарди евра (220 милијарди фунти), пишува Гардијан.

Како што наведува, крајниот ефект би бил да се претворат многу земји кои во моментов уживаат нето финансиски придобивки од ЕУ во нето-придонесувачи.

„Сите земји-членки ќе треба да плаќаат повеќе, а да добиваат помалку од буџетот на ЕУ, а многу земји-членки кои во моментов се нето-приматели ќе станат нето-придонесувачи“, се наведува во документот на секретаријатот на Советот на ЕУ, во кој увид имаше Фајненшл тајмс.

Украина, убедливо најголемата од деветте земји прифатени како потенцијални кандидати, ќе има право на 186 милијарди евра во текот на седум години, покрај трошоците за реконструкција на земјата, кои Светска банка оваа година ги процени на околу 400 милијарди евра, пишува весникот.

Проширувањето стана една од најитните теми за ЕУ, а лидерите се состанаа минатиот петок за да разговараат за тоа како да се насочи дебатата за клучните прашања, вклучувајќи го буџетот, бројот на места во Европскиот парламент и дали проширениот блок би можел да продолжи да гласа едногласно во одредени области.

Висок дипломат изјави за Гардијан дека се очекува буџетот да биде единственото најспорно прашање и треба да се реши до 2027 година, кога ќе започне следниот финансиски циклус, за да може ЕУ да покаже дека е подготвена и да го отстрани секој изговор за одложување на понатамошните дискусии за тоа дали и колку брзо може да се приклучат Украина, Молдавија и Западен Балкан.

Во документот се проценува дека буџетот би се зголемил за 21 отсто на 1,47 милијарди евра доколку се приклучат сите девет земји. Ова би значело значително зголемување на придонесите за Германија, Франција и Холандија, со преодни периоди неопходни за зголемување на финансирањето.

Износот потрошен за земјоделството, исто така, ќе се промени, при што Украина има право на 95 милијарди евра во текот на седум години, што е уште еден трошок што земјите-членки ќе треба да го земат  предвид. Друг клучен фонд, познат како кохезиски фонд, кој обезбедува пари за инфраструктура во помалку развиените земји, исто така би бил значително погоден од проширувањето. Според сегашната формула за финансирање, Чешка, Естонија, Словенија, Кипар, Малта и Литванија повеќе не би биле квалификувани за средства. паг/

Фото: МИА архива