Приказната за Пепелашка на Драмското студио „Летечка театарска трупа“ два дена ги забавуваше тетовци
- Драмското студио „Летечка театарска трупа“ - Тетово вечерва го заврши проектот „Пепелашка“, премиера и реприза на приказната која овие два дена измами многу насмевки и воздишки од публиката, пред се децата но и возрасните придружници. За оваа приказна режисерот Владимир Јованоски работеше со дури 23 деца актери и исто толку членови на детскиот хор „Лале“ кои настапија на сцената во Центарот за култура „Иљо Антески-Смок“.
![Приказната за Пепелашка на Драмското студио „Летечка театарска трупа“ два дена ги забавуваше тетовци](https://new.mia.mk/images/20230419211850_big_730x400_22.webp )
Тетово 19 април 2023 (МИА) - Драмското студио „Летечка театарска трупа“ - Тетово вечерва го заврши проектот „Пепелашка“, премиера и реприза на приказната која овие два дена измами многу насмевки и воздишки од публиката, пред се децата но и возрасните придружници. За оваа приказна режисерот Владимир Јованоски работеше со дури 23 деца актери и исто толку членови на детскиот хор „Лале“ кои настапија на сцената во Центарот за култура „Иљо Антески-Смок“.
- Пепелашка ги надмина и нашите очекувања како во однос на концептот на режијата, актерската игра, така и за интересот на публиката. Она што е специфично за овој проект е што претставува успешен обид за интегрирање на целокупниот ансамбл на Летечка Театарска Трупа во тесна соработка со хорски ансамбл што доведе до спој на искуство и почетнички ентузијазам. Имајќи предвид дека се работи за претстава со масовен мизансцен и обемен текст, пробите траеа повеќе од половина година, изјави режисерот Јованоски.
За оваа претстава се подготвија оригинални костими и живописна сценографија со темелни пораки до публиката.
- Покрај сценските игра и говор, актерите ги обновија знаењата за техники за изградба на лик, а неизоставно беше и зацврстувањето на другарството и меѓучовечките односи. Целта е да се пренесат универзалните човечки позитивни пораки и особини низ играта и ликовите, едукација на младата театарска публика и збогатување на културната понуда. Сметам дека ова го постигнавме со овој театарски класик за деца – Пепелашка, рече за МИА, режисерот и актер Владимир Јованоски.
„Пепелашка“ е проект поддржан со годишната програма на Министерството за култура. До крајот на годината „Летечка театарска трупа“ планира уште неколку премиери со кои одбележуваат 15 години постоење. ас/сх/
Фото: МИА