Скопје, 18 јули 2023 (МИА) - Здружението за промоција на документаристика „МакеДокс“ соопшти дека почна со обуката на петтата генерација „Докуникулци“ кои се дел од работилницата за креативен документарен филм. Првата сесија на работилницата се одржа од 10 до 14 јули на Пониква, а предавач беше монтажерот Мартин Иванов.

Во петтата генерација „Докуникулци“ одбрани се десет средношколци. Како што изјави Сара Ферро од „МакеДокс“, станува збор за прва иницијална сесија на која учесниците се запознаваат првпат меѓу себе и со менторот.

-На првата средба се запознаваа со основите на документарниот филм и што значи да се снима документарен филм. Сите презентираа свои идеи и преку групна работа се дискутираше за идеите на секој учесник. Учесниците на работилницата имаа по две сесии дневно, а навечер имаа проекции на документарни филмови, објасни Ферро. 

Работилницата е распоредена во четири сесии и како што е најавено, следните ќе се случуваат во август, осум дена за време на филмскиот фестивал „МакеДокс“ од 17 до 24 август во Скопје, и две есенско-зимски сесии по договор, од 5 до 7 дена. Од септември докуникулците ќе почнат да работат на три одбрани идеи за кратки документарни филмови, кои ќе треба да ги завршат до август следната година.

На работилницата, своите знаења и вештини во документаристиката ги споделуваат членови на креативниот тим на „МакеДокс“, ланските докуникулци и филмски пријатели од други земји – докажани докупрофесионалци.

Проектот е реализиран со поддршка од Националната фондација за демократија од Вашингтон - НЕД.бт/са/

Фото/ „МакеДокс“