Скопје, 1 јуни 2022 (МИА) - В.д. директорот на Агенцијата за вработување на Република Северна Македонија Беким Мурати и директорот на Хрватскиот завод за вработување Анте Лончар денеска во Загреб потпишаа Меморандум за соработка помеѓу двете институции, што означува продлабочување на досегашната соработка. На потпишувањето, како што информираат од Агенцијата, присуствувал и амбасадорот на Република Северна Македонија во Република Хрватска  Мелаим Фетаи. -Ова е прв Меморандум што Агенција за вработување го потпишува со земја - членка на Европската Унија и со него ќе се овозможи размена на најдобри искуства и практики, трансфер на знаење и подобрување на работењето на јавните служби за вработување. Предизвиците на пазарот на трудот се исти и за двете институции; од една страна - да се излезе во пресрет на барањата и потребите на работодавачите да најдат стручна и квалификувана работна сила, а од друга страна, да се овозможи што поголем број луѓе да најдат соодветно вработување, велат од Агенцијата за вработување. Заедничка крајна цел, додаваат, е да се задоволат потребите и на работодавачите и на невработените лица, а службите за вработување да бидат препознаени како нивни вистински партнер. сст/са/ ​