Скопје, 29 мај 2024 (МИА) - Повремениот репрезентативец на Португалија, Мигуел Пинто (25) е нов член на Вардар. Тој ќе остане во Скопје како дел на Вардар најмалку до јуни 2026 година, потпишувајќи двегодишен договор со тимот.

Пинто (25 години, 194 см,) игра на позиција десно крило, и доаѓа од тимот на Агуас Сантас во Португалија.

Сезонава на 27 натпревари има постигнато 73 гола. Покрај за актуелниот клуб има настапувано и за Порто, каде по една сезона, заминува на позајмица во Маиа и Гаиа. Една сезона беше позајмен и во Агуас Сантас, а последните две сезони е член на овој клуб. 

- Вардар сериозно го засилува тимот и го подмладува, создавајќи база што во иднина ќе носи добри резултати. Мигуел има карактеристики на крило кое одлично ќе се вклопи во нашиот тим, и во него препознавме играч што допрва треба да блесне. Го следевме на повеќе натпревари и сигурни сме дека во Вардар ќе игра уште подобро. Заедно со Ќосевски ќе бидат главните на таа позиција, секако со помошта на искусниот Георгиевски кој се уште има што да им пренесе од своето знаење, изјави Борко Ристовски, извршниот директор на Вардар.

Пинто е на поширокиот список на репрезентацијата на Португалија, и има и два настапи за А репрезентацијата на Португалија. зс/

Фото: РК Вардар