Лос Анџелес, 10 септември 2021 (МИА) - Компанијата Фејсбук ги пушти во продажба новите паметни очила „Реј-бан сторис“ (Ray-Ban Stories). Тие се развиени во соработка со „Есилорлуксотик“ и „Реј-бан“, соопшти нивната официјална интернет-страница. Паметните очила овозможуваат фотографирање и снимање видеа, споделување датотеки, слушање музика и повици. Цената е 299 долари и достапни се во 20 различни дизајни. Засега можат да се купат во САД, Австралија, Канада, Ирска, Италија и Велика Британија. Очилата, инаку, имаат две камери со резолуција од пет мегапиксели, како и три микрофони и звучник. Синхронизацијата со новата специјална апликација „Facebook View“ овозможува испраќање снимки од очилата до социјалните мрежи и инстантни пораки, како и зачувување на телефонот. Со ЛЕД-светлото за снимање, луѓето околу знаат кога корисникот фотографира или снима видео. Паметните очила „Реј-бан“ се првиот производ од партнерството на Фејсбук и „Есилорлуксотик“. си/гт/