Скопје, 25 август 2025 (МИА) - Во Младинскиот центар „Матично“ денеска започна серија обуки на тема „Улогата на наставниците и стручните соработници во пренесување на вредностите и моралните норми кај младите“, што ќе траат до среда.

Градоначалникот на Општина Центар, Горан Герасимовски, истакна дека обуките се наменети за директорите на основните и средните училишта, по еден стручен соработник од секое училиште, како и за наставници кои активно учествуваат во воспитно-образовниот процес.

-Со овие обуки вложуваме во иднината на нашите деца. Инвестирањето во едукацијата на наставниците и стручните соработници е клучно за градење здрави генерации кои ги почитуваат вистинските вредности, изјави Герасимовски.

Предавачи на обуките се професорките Татјана Стојаноска Иванова, Анета Бараковска, Калина Сотироска Иваноска и Софија Георгиева од Институтот „Европски соѕвездија“, кои ќе споделат современи методологии и практики за развивање на вредносниот систем и моралните норми кај младите генерации. ар/вг/

Фото: Општина Центар