18 јули 2022 (МИА)   64.- Во Рим избувнал голем пожар во кој стариот град изгорел до темели. Легендата вели дека пожарот го подметнал неурамнотежениот римски император Нерон. Но, за тоа нема никакви докази во старите извори. Веднаш по катастрофата, по наредба на царот, почнала планска изградба на Рим, така што сите згради морале да бидат ѕидани од камен отпорен на оган. 1536.- Со одлука на Парламентот во Англија била поништена власта на папата. 1610.- Умрел италијанскиот сликар Микеланџело Меризи да Караваџо, кој одлучно прекинал со идеалистичкото сфаќање на сликарството и се ориентирал кон натурализмот. Се служел со контрасти на силна светлина и длабоки сенки. Значително влијаел на француското и холандското сликарство во 17. век. 1635.- Роден е англискиот физичар Роберт Хук, секретар на Кралското друштво во Лондон, кој ги усовршил барометарот, телескопот и микроскопот и прв ја открил ќелиската структура на билките. Го докажал движењето на Земјата и на гравитационите небески тела, а е автор и на законот за истегнување на еластичните тела („Хуков закон“). 1811.- Во Калкута, Индија, е роден Вилијам Текери, англиски писател, еден од најзначајните сатиричари на 19 век. Во своите романи употребувал реалистичен и саркастичен израз, критикувајќи ги негативните појави на тоа време. Најпознато негово дело е „Панаѓур на суетата“. Умрел во Лондон, на 24 февруари 1863 година. 1817.- Умрела англиската писателка Џејн Остин. Дела: романите „Разум и чувствителност“, „Гордост и предрасуди“, „Менсфилд парк“, „Ема“, „Наговорање“. 1846.- Во Бостон д-р В. Мортон првпат во својата забна ординација го употребил етерот како средство за наркоза. Тој датум се смета за прапочеток на модерната анестезиологија. 1877.- Американскиот научник Томас Едисон во својот дневник запишал: „Нема сомнение, мене ми успеа да го забележам човековиот глас, што подоцна можам да го репродуцирам“. Веќе во декември 1877 година Едисон го патентирал својот изум што го нарекол „конзерва на човековиот глас“ - (фонограф, грамофон). 1887.- Роден е водачот на норвешките нацисти Видкун Квислинг, претседател на окупаторската влада на Норвешка во Втората светска војна од 1942 до 1945 година. Неговото име стана синоним на предавство. Осуден бил на смрт и стрелан во октомври 1945 година. 1898.- Во Париз француските научници, сопружниците Марија и Пјер Кири го откриле полониумот, прв познат радиоактивен елемент. 1918.- Роден е јужноафриканскиот правник и државник Нелсон Ролихлахи Мандела, претседател на Јужна Африка и водач на Африканскиот национален конгрес во борбата против апартхејдот. Расистичкиот режим во Јужна Африка во 1962 година го осудил на пет години затвор, а во 1964 година на доживотна робја. Од затвор, по огромниот притисок на светското јавно мислење како и јавноста во Јужна Африка, бил пуштен во 1990 година, а шеф на државата станал во 1994 година. 1921.- Роден е првиот американски астронаут Џон Глен, кој со вселенскиот брод „Меркјури - Атлас 6“ на 20 февруари 1962 година трипати ја обиколил Земјата. 1933.- Роден е рускиот писател Евгениј Алексанрович Евтушенко. Дела: збирки песни и поеми - „Патот на Ентузијастите“, „Лак и лира“, „Нежност“, „Моторен чамец за врска“, „Паѓаат бели снегови“, „Поетот во Русија е повеќе од поет“. Починал на 1 април 1917 година, во САД. 1951.- Американскиот боксер од африканско потекло Џерси Џо Волкот на 37-годишна возраст ја освоил титулата светски првак во тешка категорија, станувајќи најстар боксер на кого тоа му успеало. 1967.- Во Охрид на Третиот црковно-народен собор, Светиот Синод на Македонската православна црква, донесол одлука за прогласување автокефалност на Македонската православна црква како наследничка на обновената Охридска архиепископија. Одлуката ја соопштил новиот архиепископ Охридски и Македонски г. Доситеј (Димитрија Стојковски). По него за архиепископи на МПЦ се избрани г. Ангелариј (Цветко Крстевски), г. Гаврил (Ѓорѓи Милошевски), г. Михаил (Методи Гогов) и г.г. Стефан (Стојан Велјановски). 1986.- Во Скопје умрела Ванѓа Чашуле, истакнат македонски новинар, историчар, публицист и преведувач. Автор е на книгите „Од признавање до негирање“, „Биографијата на Гоце Делчев“, како и на други научни трудови. Носител била на „Партизанска споменица 1941“. Родена била во Радовиш, на 9 август 1923 година. 2003.- Британската полиција го пронашла телото на д-р Дејвид Кели, еден од клучните сведоци за манипулацијата со наводното оружје за масовно уништуваање во Ирак. Наведено е дека извршил самоубиство. 2007.- Најмалку 200 луѓе го загубиле животот во авинска несреќа во Бразил. Авионот од типот „Ербас А320“ на бразилската компанија ТАМ, со 176 патници и членови на екипажот, се запалил при слетување на аеродромот Конгоњас во Сао Паоло. Освен патниците во авионот, животот го загубиле и голем број луѓе на земјата.   ###