Скопје, 16 јули 2025 

Министерот за европски прашања, Орхан Муртезани, денеска одржа тематски брифинг со претставници на медиумите, посветен на спроведувањето на Реформската агенда 2024 - 2027 година, како дел од редовната, навремена и транспарентна комуникација со медиумите и со јавноста, кои се важен елемент во унапредувањето на европскиот реформски процес.

На брифингот беше направен преглед на досегашните резултати, презентирана тековната реализација и најавени беа следните чекори во имплементацијата на Агендата, која претставува стратешки документ што го трасира патот кон усогласување со европските стандарди во пет приоритетни области: управување со јавни финансии, енергетска транзиција, подобрување на деловната клима, владеење на правото и дигитална трансформација.

Министерот Муртезани информираше дека дел од реформските мерки се веќе успешно спроведени и потврдени од страна на Европската комисија, додека за останатите се продолжува со стабилен и структуриран реформски процес, согласно утврдената временска рамка.

Остварените резултати досега овозможија активирање на значителна европска финансиска поддршка, а Муртезани нагласи дека реформите што се спроведуваат не претставуваат формалност, туку суштинска алатка за зајакнување на институционалните капацитети, подобрување на економските перформанси и унапредување на квалитетот на јавните услуги.

Министерство за европски прашања

______________________________________________________

МИА овие текстови ги објавува во интегрална и оригинална форма и не е одговорна за нивната содржина, ниту за евентуалните правописни недоследности или печатни грешки

Фото: МЕП