Манчестер, 11 декември 2024 (МИА) - Ѕвездата на Баер Леверкузен, Флоријан Вирц сигурно ќе биде меѓу главните цели на европските гиганти следното лето. Најголем интерес за него покажуваат Реал Мадрид и Баерн Минхен, но се очекува наскоро во наддавањето да се приклучи и англискиот шампион Манчестер Сити, пишуваат медиумите на Островот.

Вирц одлично се претстави во дресот на Леверкузен и минатата сезона ја имаше главната заслуга за титулата на „аспирините“. Леверкузен се очекуваше да го продаде Вирц минатото лето, кога Реал и Баерн дадоа понуди, но самиот играч ги одби и реши да остане уште една година на „Бај Арената“. Новите понуди ќе дојдат на лето и се очекува да надминат 100 милиони евра.

Според информациите, Манчестер Сити во него гледа идеална замена за Кевин Де Бруин, кој речиси сигурно ќе ги напушти „граѓаните“ следното лето. Менаџерот Пеп Гвардиола веќе го советувал раководството на клубот да се обиде да го ангажира Вирц, иако е свесен дека нема да биде лесно со оглед на конкуренцијата.

Сепак, беше објавено дека Манчестер Сити сака да му понуди на Леверкузен повеќе од само пари и се надева дека тоа на крајот ќе излезе во нивна корист. Шампионите на Англија се подготвени во пакетот да вклучат и еден свој фудбалер кој може да биде замена на Вирц за Леверкузен. Тие се подготвени да го дадат Оскар Боб или Џејмс Макати и сметаат дека оваа понуда за германскиот клуб ќе биде многу примамлива. дс

Фото: Архива