Атина, 12 декември 2023 (МИА) – Надлежните министри за заштита на граѓаните и за спорт на Грција, Јанис Иконому и Јанис Вруцис до обвинителката во Врховниот суд во Атина, според грчките медиуми, доставиле листа со околу 200 лица за кои постои сомневање дека се хулигани и вмешани во спортско насилство, јави дописничката на МИА од Атина.

Двајцата министри доставиле докази и податоци во име на грчката Влада, побарале кривична надградба на сите случаи поврзани со спортско насилство со цел да се пронајдат физичките и моралните сторители во сите извршени дела и да се истражи евентуално постоење на криминални организации. 

Заменик-министерот за спорт Јанис Вруцис рече дека е симболичен потег што ја истакнува нивната решителност да ги употребат сите средства што ги имаат на располагање за да се гарантира безбедноста во спортските објекти.

-Информациите што ги поднесовме се однесуваат на реални случаи, кои покажуваат дека насилството на навивачите ги надминува границите на спортот и низ времето се поврзува со лица кои упатуваат на криминална организација, рече Вруцис.

Министерот за заштита на граѓаните Јанис Иконому истакна дека станува збор за сериозни докази и ќе помогнат во ефикасно и одлучно справување „со бандите на хулигани, но и оние кои, евентуално, ги толерираат или поттикнуваат“. 

Денешната средба на надлежните министри со обвинителката од Врховниот суд е во рамките на мерките на грчката Влада за справување со насилството во спортот и меѓу навивачите , кои вчера ги соопшти владиниот портпарол Павлос Маринакис, а доаѓаат откако минататa седмица тешко беше повреден полицаец за време на одбојкарски натпревар. ср/зс/