Тел Авив, 9 октомври 2025 (МИА) - Крајнодесничарскиот израелски министер за финансии Безалел Смотрич изјави дека тој и неговата партија нема да го одобрат предложениот мировен договор со палестинската милитантна група Хамас, фрлајќи неизвесност околу тоа дали планот на американскиот претседател Доналд Трамп може да се одржи.

Во објава на „Х“ денеска, Смотрич изрази „голема радост“ поради претстојното враќање на израелските заложници според планот, но „голема загриженост“ за ослободување на палестинските затвореници за возврат.

Тој рече дека чувствува „огромен страв“ од последиците од „празнењето на затворите и ослободувањето на следната генерација терористички лидери кои ќе сторат сè што можат за да продолжат да пролеваат еврејска крв тука“.

Поради оваа причина, рече тој, не може да се придружи на прославите откако Израел и Хамас се согласија за првата фаза од планот на Трамп.

Израелската влада треба да се состане попладне за да ги разгледа условите на договорот и официјално да го одобри, објави „Тајмс оф Израел“, цитирајќи ја канцеларијата на премиерот Бенјамин Нетанјаху.

Се претпоставува дека предложеното примирје во Појасот Газа ќе стапи на сила дури по состанокот. Првично не беа достапни официјални информации за следните чекори по постигнатиот договор во текот на ноќта. мс/

фото: ДПА