Бангкок, 4 септември 2024 (МИА) - Тајландскиот крал Маха Ваџиралонгкорн го поддржа новиот кабинет на премиерката Паетонгтарн Шинаватра, во кој 12 нови лица се вклучени во нејзината коалициска влада од 36 членови.

Паетонгтарн (38) беше избрана од парламентот минатиот месец, станувајќи најмладата тајландска премиерка по неочекуваното отстранување на нејзиниот претходник Сретха Тависин од страна на судот.

Нејзината партија Pheu Thai, која водеше влади од 2001 година, останува доминантна сила во новиот кабинет, задржувајќи ги министрите за финансии Пичај Чунхавајра и министерката за надворешни работи Марис Сангиампогса.

Заменикот премиер Фумтам Вечајачаи го презема Министерството за одбрана, додека на местото министер за трговија е назначен главниот советник на Пхеу Тај и поранешен министер за енергетика Пичај Нариптафан.

Пхеу Тај, популистичката партија на милијардерското семејство Шинаватра, има 17 позиции во владата, кои вклучуваат министри и заменици министри, додека останатите 19 се поделени меѓу коалициските партнери.

Новата влада би можела да го поднесе својот предлог за политика до парламентот веќе следната недела.

Таа политика вклучува и прилагодување на потписната политика на Пхеу Тај за пренос на кредити од 10.000 бахти (292 американски долари) на 50 милиони Тајланѓани преку апликација за паметни телефони, од кои некои ќе се испорачуваат во готовина.

Паетонгтарн е најмладата ќерка на контроверзниот поранешен премиер Таксин Шинаватра, за кого се смета дека сè уште има значително влијание зад сцената.

Таа е втора жена и четврти член од семејството на највисоката позиција, додека останатите тројца беа сменети со државни удари или судски одлуки.

Пхеу Тај исто така ќе ги контролира министерствата за транспорт, здравство, туризам и култура, додека партијата Бумјаитај, втората најголема во сојузот, доби осум места во кабинетот, вклучувајќи ги министерствата за внатрешни работи, образование и труд.

Бумјаитај изјави дека ќе продолжи со плановите за закон за канабис за регулирање на марихуаната, откако успехот во декриминализацијата на дрогата предизвика процут на бизниси поврзани со марихуана. ссм/

фото: архива