Дебар, 27 март 2025 (МИА) - Градоначалникот на Пустец Пали Колефски максимално е ангажиран за надминување на проблемот со Македонците од Пустец, на кои не им се дозволува влез на македонска територија со албански лични карти, преку граничниот премин Стење – Горица, кај Ресен, информираа од неговиот кабинет.

Додаваат дека повеќе од оптимист е дека овој проблем присутен веќе трет ден ќе биде брзо надминат. - Согласно ситуацијата што настана со забраната за влез во Република Македонија за лица што поседуваат албански лични карти, сакаме да ве информираме дека градоначалникот на Општината е во постојан контакт со македонските власти за да се реши овој проблем што побрзо. Искрено се надеваме дека овој проблем ќе биде решен, информираа од Општината.

Оттаму додаваат дека оваа ситуација најмногу влијае на жителите на Пустец и регионот на Преспа, од каде многу сезонски работници патуваат секој ден во Македонија и истиот ден се враќаат дома.

За ова прашање вчера реагираше и Македонска алијанса за европска интеграција, МАЕИ, која наведува дека „овие лица се соочуваат со забрана за влез поради податоци во системот дека престојувале повеќе од три месеци во Македонија, иако нивниот влез и излез се случува на дневно ниво“.

-Ваква ситуација досега не постоела, а ова е првпат да се создаде ваков проблем, со што сериозно се загрозува егзистенцијата на овие луѓе. Апелираме до македонските власти итно да изнајдат решение за оваа ситуација и да овозможат непречено движење на Македонци од Мала Преспа бидејќи сезонската работа во пограничниот регион е нивен единствен приход за егзистенција на нивните семејства, наведуваат од партијата. вт/мд/

Фото: МИА архива