Софија, 4 декември 2025 (МИА) – Со едногласна поддршка, Народното собрание на Бугарија денеска го реизбра Кирил Влчев за генерален директор на Бугарската телеграфска агенција (БТА) за втор петгодишен мандат.

Обраќајќи им се на пратениците од парламентарната говорница, Влчев ја нагласи важноста на почитувањето на законскиот рок за избор, велејќи дека мандатот, заедно со самостојниот буџет и поддршката од различни кругови и политички сили, е гаранција за независноста на БТА, предвидена со Уставот.

- Бугарската телеграфска агенција (БТА) ќе остане место за вистински вести од сите и од насекаде, со јасен извор, без оценки и со слободен пристап, во услуга на сите медиуми, изјави денеска Влчев. 

На почетокот од своето обраќање пред Парламентот, Влчев истакна дека гласањето за неговата кандидатура денеска е пример дека Бугарите можат да го следат заветот на нивниот небесен патрон Свети Јован Рилски – „Трудете се да живеете во единство и со еден ум“. Тоа е исто така пример дека во Бугарија можеме да ги почитуваме правилата, вклучително и роковите што самите ги усвоивме. Влчев му се заблагодари на Народното собрание за поддршката – од пратениците до службениците во медиумската комисија, кои се погрижија да биде исполнет рокот за избори.

На почетокот на своето обраќање пред Парламентот, Влчев истакна дека гласањето за неговата кандидатура денеска е пример дека Бугарите можат да го следат заветот на својот небесен покровител Свети Јован Рилски – „Старајте се да живеете единодушно и единомислено“. Тоа е и пример дека во Бугарија може да се почитуваат правилата, вклучувајќи ги и роковите кои самите сме ги прифатиле.

Покрај парламентарната поддршка, Кирил Влчев изрази благодарност и за 75-те мислења со поддршка од околу 100 организации и личности, вклучувајќи ја Бугарската академија на науките (БАН), универзитетите, општините, како и синдикатите, творечките сојузи, културните институции, артистите и патријархот.

Бидејќи денеска е денот на Свети Јован Дамаскин, во чие житие пишува дека го следел правилото „Молчи!“, да се потсетиме дека, особено во денови со тензија како овие седмици, понекогаш треба да замолчиме за да ги чуе Господ молитвите што нашите души ги упатуваат кон Него, потсети генералниот директор на БТА.

- Затоа да се помолиме Бог да е со нас во нашите дела за постојаност и напредок на БТА во корист на сите медиуми и Бугарија. А тоа е нашата Бугарија со Балканот, морето и сите нас, во која секој пријател е добродојден, како што се пее во „Една бугарска роза“, чиј автор на текстот Најден Влчев почина синоќа – нека му е светол патот, заврши Влчев.

Инаку, Бугарската телеграфска агенција (БТА) ја гарантира својата независност преку неколку клучни законски механизми, меѓу кои се самостојниот буџет и петгодишниот мандат на генералниот директор, кој го избира Парламентот.

За 2024 година, вкупниот буџет на БТА, кој беше обезбеден преку трансфер од Централниот буџет и сопствени приходи, изнесуваше 16,7 милиони левови (околу 8,5 милиони евра). Оваа финансиска самостојност ја штити агенцијата од непосреден извршен притисок.

Дополнително, Законот за БТА ја зацврстува нејзината улога на јавен сервис со предвидување на слободен и бесплатен пристап до нејзините основни информативни продукти. ссм/

фото: БТА