Дебар, 12 декември 2023 (МИА) – Познат по својата хуманост, Сафет Алили, од долнореканското село Присојница, иселеник во Луксембур, продолжува со неговата хуманост. Деновиве тој донираше медицински помагала за неколку скопски клиники.

- По донацијата во Здравствениот дом „Русе Бошкоски“ во Ростуше, деновиве доставивме донација од медицински помагала, инвалидски колички, дигалки за пациенти и друго и за потребите на Клиниките за онкологија, трауматологија, хирургија, ортопедија, во Скопје, онаму каде што во мометов се најпотребни. Дел од помошта ќе има и за Општата болница во Дебар. Овој пат станува збор за над 500 медицински помагала, рече Алили за МИА.

Додава дека ова е трет хуманитарен проект што го реализира заедно со неговите најблиски преку хуманитарната асоциација „Letzcare“ во Луксембург, каде што живее со фамилијата, а тука во татковината главни партнери им се Здравствениот дом во Ростуше, општина Маврово и Ростуше и Националниот парк „Маврово“.

- Помошта никогаш не е доволна. Свесни сме дека истата им е потребна и на други. Продолжуваме со мотото „материјалното богатство споделете го со друг, оној кому му е потребно“. Ова е трет проект. Почетокот беже тежок но сега нештата се поедноставени. Со првиот проект дониравме медицински помагала, опрема, апарати за Здравствениот дом во Ростуше и Заводот за белодробни заболувања во Отешево, за каде беше донирана помош во рамки на второт проект. Со третиот проект, освен медицински помагала дониравме и учиштен инвентар, додава тој.

Се подготвуваат и за следена донација, која ќе се состои од 100 компјутери наменети за училиштата во општина Маврово и Ростуше, за што се чека само на потребната административна процедура.

Родителите на Сафет Алили потекнуваат од селото Присојница, Долна Река, општина Маврово Ростуше, роден е и живел во Тетово, а од 1991 година живее во Луксембург, со неговото и семејствата на неговите браќа, кои заедно се вклучени во хуманитарните активности.

-Кога доаѓам во татковината тогаш тоа е Присојница, тука ми е најубаво. Апелирам татковината да ја помагаат и други наши иселеници, зашто таа се сака со дела а не само со зборови, порачува Алили. вт/цр

Фото: „Letzcare“