Берлин, 15 јуни 2024 (МИА) - Мировниот процес треба да започне овој викенд на дводневната конференција за Украина во Швајцарија. Се очекуваат сто земји и организации, не вклучувајќи ги Русија и Кина, но очекувањата се мали - пишува германскиот информативен сервис Дојче веле.

За украинскиот претседател Володимир Зеленски, конференцијата во Швајцарија ќе биде врв на дипломатскиот маратон за Украина, бидејќи тој и многу светски лидери од луксузниот хотел на југот на Италија во близина на Бари, каде што беа поканети на самитот на Г7 во необично голем број, пристигнаа за викенд во Швајцарија во не помалку луксузниот комплекс „Birgenstock Resort“ над езерото Луцерн, каде што се водеа мировните преговори за Судан во 2002 година и за Кипар во 2004 година.

Германскиот канцелар Олаф Шолц за време на третата конференција за обнова на Украина во Берлин оваа недела изјави дека се надева дека со мировната конференција во Швајцарија на 15 и 16 јуни „ќе произлезе нешто што ќе не приближи до мирот“.

До него стоеше Зеленски, а за него веќе е успех тоа што конференцијата воопшто се одржува по негово барање.

-Многу е тешко да не се загубат сојузниците и земјите партнери. А обединувањето на земјите партнери и оние кои не се, само по себе е тешка задача за Украина, рече Зеленски.

Шолц додаде дека можеби Швајцарија „би можела да покаже начин како успешно да влезе во процес во кој Русија еден ден ќе биде на маса кога ќе биде вистинскиот момент, но само Украина ќе одлучи за тоа“.

Русија уште порано јасно стави до знаење дека нема да учествува на таа конференција.

Германската влада особено долго време лобира за учество на Кина, но Пекинг одби да учествува.

Затоа, од 160 поканети делегации, 100 земји и организации ја прифатија поканата - пишува на веб-страницата на Владата на Швајцарија, каде може да се види и актуелната листа на учесници.

На списокот склучен попладнето на 14 јуни, учесниците на конференцијата вклучуваат 57 шефови на држави или влади, меѓу кои и претседателот на Украина Володимир Зеленски, германскиот канцелар Олаф Шолц и американската потпретседателка Камала Харис.

Министрите, меѓу кои и министерот за надворешни работи на Србија, Марко Ѓуриќ, претставуваат 29 земји.

Дури и пониски претставници беа испратени од Израел, Индонезија, Филипините, Јужна Африка, ОАЕ, како и Бразил, како набљудувачи.

Доаѓаат и делегации од шест организации: Европската комисија на чело со Урсула фон дер Лајен, Советот на Европа, Европскиот совет, Европскиот парламент и како набљудувачи: Вселенскиот патријарх Вартоломеј и Обединетите нации.

Се вели дека Русија извршила притисок, особено врз земјите од „глобалниот југ“, да ја бојкотираат швајцарската конференција. Затоа швајцарските организатори гледаат на толку голем број делегации кои ја прифатиле поканата како делумен успех.

Очигледно и тоа беше можно бидејќи дневниот ред беше значително скратен, наведува Дојче Веле.

Швајцарската федерална претседателка Виола Амхерд рече дека ова е процес кој ќе создаде услови „за иден мировен самит со учество на Русија“.

Во завршната декларација на конференцијата не треба да се споменува итно прекинување на руската агресивна војна, ниту повлекување на Русија од Украина, што е токму она што го предвидува мировниот план на Украина.

Во суштина, ќе се работи за безбедноста на нуклеарните централи - од кои едната е најголема во Европа, на линијата на фронтот на југот на Украина, која беше окупирана од руски војници.

Ќе разговараат и за натамошниот извоз на жито од Украина, особено во земјите од „глобалниот југ“, и ослободувањето на украинските деца киднапирани од Русија од окупираните територии.

Зеленски вели дека за него е клучно неговата земја „да не ја изгуби иницијативата“. Исто така, клучно е иницијативата „да не биде дадена никому, особено не на Русија, бидејќи руската иницијатива во однос на нејзината визија за завршување на војната беше целосно видена на денот на инвазијата“, рече Зеленски и додаде: „Руската визија е окупација на нашата земја“, пренесе Бета. мс/

фото: ДПА