Крива Паланка, 8 април 2023 (МИА) - Во спортската сала "Бранители 2001" во Крива Паланка денес се одржа Државното карате првенство за млади од 10 до 13 години, момчиња и девојчиња, во кати и борби. На првенството учествуваа над триста каратисти од 55 клубови во државата.

Присутните ги поздравија претседателот на Карате федерацијата на Северна Македонија, Петар Белистојановски и градоначалникот на Општина Крива Паланка, Сашко Митовски.

-Големо е задоволството нашата Општина Крива Паланка да биде домаќин на еден ваков масовен и значаен спортски настан, Државно карате првенство за млади од 10 до 13 години, а уште поголемо е задоволството што за првпат сме домаќини на едно државно карате првенство. Тоа е јасен показател дека она кон што стремиме со постојаните вложувања во спортската инфраструктура и во спортот, преку поддршката на клубовите и младите таленти ја прави Крива Паланка препознатлива на спортската мапа во државата. Прекрасна е глетката да се видат на едно место над 300 спортисти собрани со една цел, да го покажат најдоброто од себе и нивните тренери и родителите да се гордеат со нов. Уште повеќе, мора да истакнам дека првенството е денес во нашиот град и благодарение на тоа што две децении успешно работи и создава нови шампионски генерации во карате спортот, клубот Шампион.

Крива Паланка и нивниот јубилеј ќе биде запаметен и одбележан и со овој масовен спортски собир на најдобрите млади каратисти од целата држава. Честитки за работата на тренерите на шампионите, Стевче Христовски и Жарко Ангеловски, кои се заслужни што градот има со кого да се гордее, како спортски репрезенти и амбасадор, ќе набројам неколку од нив,а ги има многу, тука се: Христијан Димитриевски, Марија Спасовска, Јована Мицовска, Вукашин Јовановиќ, Теодор Павловски, само дел од плејадата успешни, повеќекратни државни прваци и репрезентативци, рече Митовски.

Посочи дека судејќи по она што го гледа тука, преполната сала и десетмината претставници на "Шампион" и Крива Паланка на денешното првенство, верува дека доаѓаат нови наследници на успешните репрезенти на градот во карате спортот. ид/зс/