Во Велес вечерва слави ВМРО-ДПМНЕ
- Кандидатот на коалицијата на ВМРО ДПМНЕ за градоначалник на Општина Велес Марко Колев вечерва во центарот на Велес пред голем број присутни граѓани прогласи победа во првиот круг од локалните
![Во Велес вечерва слави ВМРО-ДПМНЕ](https://new.mia.mk/images/20221108203358_big_730x400_33.webp )
Велес, 17 октомври 2021 (МИА) - Кандидатот на коалицијата на ВМРО ДПМНЕ за градоначалник на Општина Велес Марко Колев вечерва во центарот на Велес пред голем број присутни граѓани прогласи победа во првиот круг од локалните избори 2021 пред својот противкандидат од коалицијата на СДСМ Ненад Коциќ.
Во своето обраќање до велешани на прославата во центарот на Велес, Марко Колев истакна дека разликата е огромна. Тој им се заблагодари на сите што помогнаа и учествуваа во кампањата и на сите што својот глас го дадоа за него и коализијата на ВМРО-ДПМНЕ.
-Времето не’ не послужи, но љубовта и желбата за просперитетен Велес, за Велес кој го сакаме успеа. Сакам да порачам дека на митинзите и настапите зборував многу јавно и отворено. Не омаловажуваа, ни го деградираа образованието, ни ја деградираа работата, но издржавме машки. Е, сега ќе ви покажеме како се работи за Велес. Како се работат проекти и како се мисли на велешани, порача Колев.
Воедно Колев упати апел за смирување на страстите во Велес, затоа што, како што рече, Велес мора да оди напред.
-Велес мора да фати чекорот со другите градови околу нас, затоа што Велес е срцето на Македонија, порача Колев.
Од ОК на ВМРО-ДПМНЕ Велес информираат дека водат и во освоени гласови во Советот на Општина Велес. ад/аа/