Скопје, 29 октомври 2024 (МИА) - Предизвиците и можностите во контекст на брзата дигитална трансформација и влијанието на вештачката интелигенција (ВИ) врз работната сила се во фокусот на 19. годишна конференција на Стопанската комора за информатички и комуникациски технологии МАСИТ која започна денеска во Скопје.

Претседателката на МАСИТ, Анета Пешева, на отворањето на конференцијата истакна дека, иако ВИ ќе помогне во животот на луѓето, тоа ќе доведе до многу превирања. Таа посочи дека големите финансиски институции предвидуваат дека од пет до десет години, 300 милиони луѓе ќе ги изгубат своите работни места, а програмерите ќе мора да станат сервисери на мрежите и роботиката.

- Најголемиот проблем не е моментален, тој ќе се случи за десетина години, рече Пешева, нагласувајќи ја потребата од регулација за балансирање на интересите на оние кои ќе останат без работа.

Министерот за дигитална трансформација, Стефан Андоновски, ги потенцираше значајните улоги на информатичките технологии и компании во националниот развој.

- МАСИТ активно придонесува за позиционирање на Македонија на глобалната ИКТ мапа. Темите за Испреплетување на ВИ и работна сила се од суштинско значење за нашата дигитална иднина и општеството воопшто, рече Андоновски.

Тој сподели дека се започнати процеси за изработка на национална ИКТ стратегија, целосно усогласена со целите на ЕУ, со амбиција Македонија да биде дигитален лидер во трансформација.

Директорот на канцеларијата за економски раст на УСАИД во Македонија, Тимоти Онг, истакна дека се посветени на помагање на секторот да порасне.

- Преку дигитална трансформација може да се спречи корупцијата, да се задржат младите таленти и да се направи земјата привлечна за инвестиции, рече Онг, нагласувајќи дека ВИ го менува начинот на кој работиме и оти мора да се работи на иновации и обука на вработените.ар/лв/

фото: МИА