Белен: Немојте да ја изгубите целта од вид, Австрија е ваш сигурен партнер на патот кон ЕУ
- Немојте да ја изгубите целта од вид, да работиме заедно, за скорешен прием на Северна Македонија во ЕУ. Австрија останува ваш сигурен партнер, изјави австрискиот претседател Алексанадар Ван дер Белен на денешната заедничка прес - конференција во Скопје со неговиот домаќин шефот на државата Стево Пендаровски.
![Белен: Немојте да ја изгубите целта од вид, Австрија е ваш сигурен партнер на патот кон ЕУ](https://new.mia.mk/images/20230329125933_big_730x400_80.webp )
Скопје, 29 март 2023 (МИА) - Немојте да ја изгубите целта од вид, да работиме заедно, за скорешен прием на Северна Македонија во ЕУ. Австрија останува ваш сигурен партнер, изјави австрискиот претседател Алексанадар Ван дер Белен на денешната заедничка прес - конференција во Скопје со неговиот домаќин шефот на државата Стево Пендаровски.
-Вие сте на вистинскиот пат и Австрија целосно ќе ве поддржува во тоа. Убедени сме дека ќе успеете да ја направите промената на Уставот и да продолжите по својот пат кон ЕУ. Австрија целосно ќе ве поддржува на тој пат, рече Белен.
Тој нагласи дека земјава со Охрискиот рамковен догор е пример во регионот во однос на етнички и религиски соживот, а за да продолжи процесот на проширување би било нужно да се промени Уставот. Во Австрија, вели, знаат дека промената на Уставот е нешто што политички предизвикува тензии, но, треба да се гледа напред, да се работи во правец на заедничка европска иднина.
-Знаеме дека вашиот пат кон ЕУ е тежок, дека фрустрацијата за времетраењето на процесот е разбирлива, но ве молиме немој да ја изгубите целта од вид. Хрватска покажа дека приемот е можен кога сите значајни политички сили влечат во ист правец. Да работиме заедно за скорешен примен на Северна Македонија. Јас можам да гарантирам дека Австија и во иднина ќе ви стои на располагање како сигурен партнер, вели Ван дер Белен
На новинарско прашање во однос на поддршката на уставните измени, тој истакна дека ќе одржи говор во Парламентот и ќе ги замоли сите пратенички групи да размислат што во спортивност се става на ризик. Порача да не се драматизира овој чекор.
-Имајќи на ум дека заштитата на малцинства во Северна Македонија и онака е нешто, колку што јас можам да проценам, што се подразбира. Така што, овој следен чекор сега, според мене, не би требало да биде драматизиран, вели Белен.
Претседателот Пендаровски истакна дека украинската криза може да ја поттикне интеграцијата на регионот во ЕУ, а како докажан пријател Австрија ја форсира политиката на проширување на ЕУ
-Австрија како докажан пријател на регионот има значајна улога во форсирањето на политиката на проширување на Европската Унија со земјите од Западниот Балкан, а во тие рамки, оваа посета на австрискиот претседател укажува и на важноста на нашата евроинтеграција, рече Пендаровски.
Двајцата се согласиле дека во отсуство на јасна европска перспектива, евроскептицизмот ќе продолжи да расте и сигурно ќе биде сигнал за некои други сили кои работат спротивно на европските вредности.
Посебен фокус во разговорите бил ставен и на интензивирањето на економската соработка.
Пендаровски посочи дека Австрија е наш значаен трговски партнер и прв странски инвеститор со вкупни инвестиции од близу една милијарда евра и со присуство на 54 активни австриски компании на македонскиот пазар.
-Во тој контекст ги поздравуваме и поддржуваме активностите на Македонско-австриската бизнис-асоцијација. Заеднички геостратегиски интерес е југоистокот на Европа да биде демократски и развиен за да биде мост за економска размена со растечките пазари на Азија, порача Пендаровски.
Ван дер Белен нагласи дека австриските инвестиции се најбројни во земјава, а фактот што со него дојдоа и претставници од 25 австриски компании сведочи за заинтересираноста за натамошно унапредување на економската соработка.
Следната година се одбележуваат 30 години од воспоставувањето на дипломатските односи што се гледа како уште една можност за реафирмирање на македонско-австриското пријателство и соработка.вг/са/