Техеран, 3 август 2024 (МИА) - Иран уапси најмалку 20 лица поради сомневање за поврзаност со атентатот на политичкиот лидер на „Хамас“ Исмаил Ханија во Техеран, пишува Њујорк Тајмс, повикувајќи се на двајца Иранци запознаени со истрагата. Меѓу уапсените се високи ирански разузнавачи, воени функционери и персонал во пансионот управуван од Иранската револуционерна гарда (IRGC), се наведува во извештајот. Иранците стравуваат дека атентатот бил овозможен со голем пробив во безбедноста меѓу високите функционери.

Апсењата на високо ниво следуваа по експлозијата во која беше убиен Исмаил Ханија, кој ја предводеше политичката канцеларија на Хамас во Катар. Тој беше во посета на Техеран на инаугурацијата на новиот ирански претседател и престојуваше во пансион во северниот дел на градот.

„Перцепцијата дека Иран не може да ја заштити ни својата татковина ни своите клучни сојузници може да биде фатална за иранскиот режим, бидејќи во основа им сигнализира на своите непријатели дека ако не можат да ја срушат Исламската Република, можат да ја обезглават“, рече Али Ваез, ирански директор на Меѓународната кризна група.

Специјализираната разузнавачка единица за шпионажа IRGC ја презеде истрагата и бара осомничени за кои се надева дека ќе ги доведат до членовите на тимот за убиство кој го планирал, помогнал и извршил убиството, според двајца ирански функционери, пишува Њујорк Тајмс.

Веста за сеопфатните апсења пристигна по соопштението на IRGC дека „размерот и деталите за овој инцидент се под истрага и ќе бидат објавени во догледно време“.

Интензитетот и обемот на истрагата откриваат до кој степен атентатот го шокирал и вознемирил раководството на земјата. Иранските функционери и Хамас изјавија дека Израел е одговорен за атентатот, што е проценка која ја донесоа и неколку американски функционери. Израел, кој вети дека ќе ги уништи капацитетите на Хамас, не призна дека е одговорен за поставувањето на бомбата.

Британски „Телеграф“ претходно објави дека Мосад ангажирал ирански безбедносни агенти да постават експлозив во пансионот, а потоа да го детонираат на далечина, но функционер на Хамас во Иран изјави за новинската куќа Ал-Араби Ал-Џадид дека Ханија бил погоден со воздушен проектил.

Британскиот весник наведува дека Мосад, израелската разузнавачка агенција, ангажирала агенти на Иранската револуционерна гарда (IRGC) да постават експлозив во три одделни простории на зградата во која престојувал Ханија. Првичниот план бил да се убие политичкиот лидер на Хамас, уште во мај кога присуствувал на погребот на поранешниот ирански претседател Ебрахим Раиси. Но, операцијата тогаш не била спроведена поради големата гужва во зградата и големата веројатност за неуспех.

Меѓутоа, според Телеграф, двајца агенти сепак поставиле експлозивни направи во три простории на Корпорацијата на исламската револуционерна гарда (IRGC) во северен Техеран каде што се претпоставувало дека Ханија би можел да престојува. Агентите биле забележани како се движат од една просторија во друга, што било потврдено од официјални лица кои имале снимки од видео надзорот поставен на зградата. Исто така, се истакнува дека на крајот тие оперативци побегнале од Иран додека нивниот главен извор останал во државата. Во средата, во 2 часот наутро експлозивот бил детониран од странство.

„Сега се сигурни дека Мосад ангажирал агенти од безбедносната единица Ансар ал-Махди“, рече официјален претставник на иранската револуционерна гарда, мислејќи на единицата задолжена за заштита на високите претставници. ссм/

фото: ЕПА