Скопје, 20 април 2020 (МИА) - Се преземаат мерки за утврдување на законитоста на постапувањето на полициските службеници во врска со денешното лишување од слобода на момче кое е затекнато надвор од својот дом со миленик за време на полицискиот час, напиша на Фејсбук министерот за внатрешни работи Наќе Чулев.  -Во текот на денешниот ден на социјалната мрежа Фејсбук се споделува видео на кое се забележуваат неколку полициски службеници кои преземаат мерки за лишување од слобода на лице кое е затекнато надвор од својот дом со својот миленик за време на ограничувањето на движењето на граѓаните. Во таа насока би сакал да ја информирам јавноста дека од страна на Одделот за внатрешна контрола, криминалистички истраги и професионални стандарди конкретниот случај е евидентиран и се преземаат мерки за утврдување на законитоста на постапувањето на полициските службеници, a за исходот од проверките во текот на утрешниот ден дополнително ќе биде известена јавноста, напиша министерот Чулев.