Виторија, 3 јануари 2025 (МИА) – Тренерот на Црвена ѕвезда, Јоанис Сферопулос ги пофали своите кошаркари за прикажаното синоќа на гостувањето кај Басконија. Црвено-белите ја победија шпанската екипа од Виторија со 75:73 во 19. коло од Евролигата.

- Сакам да им честитам на моите играчи, не е лесно да се победи овде. Мислам дека во најголем дел ја контролиравме играта, Басконија упати неколку тешки удари на крајот и се врати. Сепак, тогаш покажавме карактер, не кревавме паника, во последните две минути донесовме добри одлуки во нападот и одбраната и на крајот го добивме натпреварот. Честитки и за играчите на Басконија и тренерот Пабло Ласо кој одлично си ја врши работата, истакна Сферопулос.

Гркот смета дека одбраната била клучна за триумфот на неговиот тим.

- Басконија имаше само 13 асистенции. Направивме добра работа и на Хауард, тој шутираше два од десет за три, сето тоа беа тешки обиди. Во последните две, три минути ја зацврстивме одбраната, тоа беше клучот за победата.

Црвена ѕвезда по оваа победа има биланс 11-8, додека Басконија е на 8-11 (победи-порази). зс/

Фото: ЕПА