Скопје, 13 септември 2022 (МИА) - Министерот за внатрешни работи Оливер Спасовски денеска остварил работна средба со претставничката на ОБСЕ за слобода на медиуми Тереза Рибеиро. На средбата Спасовски ја потенцирал посветеноста и одличната соработка на МВР со медиумите и медиумските работници и овозможување на услови за нивно непречено работење. - Одличната соработка се надоградува преку заеднички работилници и други активности на полицијата и новинарите, а во голем дел од овие активности учествува и Мисијата на ОБСЕ во Скопје, се наведува во соопштението од МВР. Спасовски потенцирал дека токму денеска беа презентирани и резултатите од проценките за отвореност на институциите, а МВР, рекол,е една од највисокорангираните институции. Ја нагласил посветеноста за уште поинтензивна соработка на ова поле, што е од интерес за целото општество и упатил благодарност до Мисијата на ОБСЕ за одличната соработка во изминатиот период. Рибеиро ја потенцирала важноста на слободата на медиумите за развојот на едно општество, а во таа насока, истакнала, особено е важна безбедноста на новинарите. - Таа изрази задоволство од сето она што во изминатиот период е направено на ова поле, со очекување да се продолжи во истиот правец, а за тоа е потребно зајакнување на законската рамка за заштита на новинарите, соопштија од МВР. Рибеиро и Спасовски се согласиле дека измените во кривичниот законик во насока на подобрување на безбедноста на новинарите, а кои се очекува да бидат усвоени од Парламентот, ќе дадат голем придонес за тоа. цр/дма/