Скопје, 17 јули 2024 (МИА) - За динамиката на капиталните проекти што во државава се реализираат со поддршка од Европската банка за обнова и развој (ЕБОР) и можноста за идна соработка со Банката разговарале денеска вицепремиерот и  министер за транспорт, Александар Николоски, и директорот на ЈП ЖРСМ - Инфраструктура, Синиша Ивановски, со Фатих Туркменоглу, шеф на канцеларијата на ЕБОР во нашата земја. 

Средбата се одржала во Министерството за транспорт кое соопшти дека Николоски информирал и за проектите предвидени во владината програма со посебен акцент на инвестициите во патната, железничката и гасоводната инфраструктура.

-Тој истакна дека во периодот што претстои, Владата преку Министерството за транспорт ќе ја засили инвестициската активност, се со цел забрзан економски развој на државата. Министерот изрази задоволство од поддршката што ја овозможува ЕБОР за Македонија во овие неколку децении и изрази надеж за продолжување на таквата соработка и во следниот период, соопшти Министерството за транспорт.

Николоски нагласил дека Европската банка за обнова и развој „е наш силен подржувач во реализацијата на капиталните проекти“ и оти верува дека таквата соработка ќе продолжи и во следниот период.

-Имаме силна програма, многу проекти во инфраструктурата, како на централно, така и на локално ниво, и се надевам дека со ЕБОР, па и со другите меѓународни кредитори, ќе најдеме заеднички интерес во нивната реализација. Нашата цел е квалитетна ифраструктура и задоволни граѓани, а токму тоа го определува и владината програма, истакнал министерот Николоски по средбата. хс/ев/

Фото: Министерство за транспорт