Москва, 14 јули 2023 година (МИА) - Руските парламентарци денеска усвоија закон со кој се забранува промена на полот и посвојување деца од трансродови лица.

„Оваа одлука ќе ги заштити нашите граѓани, нашите деца“, рече претседателот на Долниот дом на Парламентот (Дума), Вјачеслав Володин.

Промени во граѓанскиот статус, хируршки операции и хормонски третмани беа достапни во Русија по распадот на Советскиот Сојуз.

Сепак, од почетокот на руската инвазија на Украина, руските власти почнаа да воведуваат конзервативни мерки, особено против ЛГБТ заедницата.

Како образложение се наведува желбата да се елиминира однесувањето кое е „девијантно и увезено од Запад“.

Предлог-законот помина на третото и последно читање. Сега тоа треба да биде потврдено од Горниот дом на Парламентот, Советот на Федерацијата. Потоа следи потписот на претседателот Владимир Путин за да стапи во сила. паг/

Фото: МИА архива