Скопје, 21 октомври 2025

Завршната конференција на Младинскиот политички лабораториум за Зелената Агенда, организирана од проектот „Youth Lab“ на Советот за регионална соработка (WBYL2), финансиран од ЕУ, се одржа денес во Љубљана. Настанот ги собра младите визионери, креаторите на политики и регионалните партнери за да покажат како идеите водени од младите ја обликуваат иднината на Зелената Агенда на Западен Балкан. Ова го означи финализирањето на третиот Младински политички лабораториум, по оние посветени на младинската невработеност и менталното здравје, се наведува во соопштението на Советот за регионална соработка (РСС), коешто МИА го објавува интегрално.

„Младинскиот политички лабораториум претставува мост меѓу генерациите и институциите, поттикнувајќи дијалог кој ги претвора иновативните идеи во конкретни политики. Младите од целиот Западен Балкан докажуваат дека одржливата промена започнува со локално делување и заедничка визија. Резултатите презентирани денес се само почеток, а нивниот успех дополнително зависи од постојана поддршка и активна вклученост на младите за овие иницијативи да се претворат во опипливи резултати низ шесте земји од  Западен Балкан,“ истакна Оѓнен Марковиќ, раководител на тимот Youth Lab, во своето обраќање.

Конференцијата со наслов „Расцутена градина на утрешнината“ ги собра копретседавачите на Лабораториумот за младински политики, претставниците на младинските совети, креаторите на политики и различни засегнати страни. Говорници беа г-ѓа Маја Шуслер, политички известувач во Претставништвото на Европската комисија во Словенија; г. Антонио Јовановски, специјалист за климатски промени и одржливост во УНИЦЕФ Европа и Централна Азија; и г. Симон Јануш, стручен соработник од Одделението за заштита на животната средина на Град Љубљана и мисијата „100 градови до 2030 година“.

Со директно вклучување на младите во процесот на создавање на политики, Лабораториумот ја промовира инклузивноста, ја зајакнува меѓусекторската соработка и придонесува за имплементација на Зелената Агенда преку иницијативи водени од младите. Во изминатата година и пол, работните групи од регионот заеднички дизајнираа практични решенија за позелени и поодржливи заедници.

Низ шесте земји на Западен Балкан, младите постигнаа значителен напредок во Зелената Агенда преку бројни иницијативи. Развиени се „Прирачникот за зеленото седиште“ (The Green Seat Manual) и методологија за воведување „зелено седиште“ (methodology for introducing a “green seat”) во локалните младински совети, со што младите се овозможуваат да водат еколошки активности. Организирани беа младински дијалози за да се дадат сознанија за регионалните анализи на Зелената Агенда и „Еко Бонтон“. Изготвена е Сеопфатна анализа на празнините за да се зајакне учеството на младите во процесот на одлучување во животната средина. Воспоставена е рамка и методологија за Младински климатски совети, поддржувајќи структурирано вклучување на младите во климатски активности. Практичниот водич за активна младинска партиципација во локално донесување на еколошки одлуки и придружните работилници им овозможија на младите алатки и знаење за активно влијание врз локалните зелени политики. Беа изработени образовни ресурси, вклучително и Еко младинскиот речник, додека паралелно со тоа беа спроведени кампањи за промовирање на младинското вклучување во еколошки иницијативи. Колективно, овие иницијативи го истакнуваат креативниот дух, лидерството и соработката на младите во регионот, водејќи кон значајни промени за одржлива иднина.

Надоврзувајќи се на постигнатиот напредок и научените лекции од процесот на Зелената агенда, WBYL2 наскоро ќе го започне четвртиот Младински политички лабораториум, кој ќе биде посветен на дезинформациите и медиумската писменост. Ова следно издание ќе им овозможи на младите да се справат со еден од најгорливите предизвици на нашето време, со истиот соработувачки и напредно ориентиран дух што ја обележа работата на Лабораториумот за Зелената агенда.

Повеќе за проектот WBYL: Проект Младинска лабораторија на Западен Балкан

Проектот е финансиран од Европската унија и го спроведува RCC.

Фото: Совет за регионална соработка (РСС)