Мадрид, 23 август 2024 (МИА) - Реал Мадрид на својата официјална веб-страница објави дека по лекарските прегледи на Џуд Белингем, констатирана е повреда на мускулот на десната нога. 

„По денешните прегледи извршени врз нашиот играч Џуд Белингем од лекарскиот тим на Реал Мадрид, констатирана е повреда на мускулот на десната нога. Ќе се следи неговата состојба и ќе се преземаат мерки во зависност од развојот на повредата“, известуваат од клубот.

Белингем претходно денеска го заврши тренингот откако доби удар. Веднаш бил прегледан и констатирана е повреда, која се очекува да го оддалечи од терените еден месец.

Доколку тоа е случај, сигурно ќе ги пропушти следните три натпревари на Реал во Ла Лига, односно дуелите со Ваљадолид, Лас Палмас и Бетис.

Потоа следува репрезентативна пауза, па најверојатно ќе биде подготвен за пресметката со Реал Сосиедад на 15 септември или евентуално за мечот против Еспањол седум дена подоцна. дс

Фото: Архива