Протест на вработените во судска администрација, поддршка добија од претседателот на Судскиот совет
- Во Скопје попладнево се одржа протестен марш во организација на Независниот синдикат на судска администрација. Маршот започна од пред платото на Основен Кривичен и Граѓански суд, а заврши пред зградата на Судски совет. Таму, претставници на синдикатот имаа средба со претседателот на Судскиот совет, Сашко Георгиев.
![Протест на вработените во судска администрација, поддршка добија од претседателот на Судскиот совет](https://new.mia.mk/images/20230919162637_big_730x400_86.webp )
Скопје, 19 септември 2023 (МИА) - Во Скопје попладнево се одржа протестен марш во организација на Независниот синдикат на судска администрација. Маршот започна од пред платото на Основен Кривичен и Граѓански суд, а заврши пред зградата на Судски совет. Таму, претставници на синдикатот имаа средба со претседателот на Судскиот совет, Сашко Георгиев.
Меѓу барањата на синдикатот се и зголемување на платата за 78 проценти од минимална и додатоците на плата за 35 отсто од судскиот буџет.
Јасмина Величкова, претседателка на Независниот синдикат на судска администрација, информираше дека биле на средба со Георгиев за да ги искажат барањата и како што посочи, наишле на разбирање.
Георгиев во изјава за медиумите по состанокот рече дека очекуваат разбирање од министерот за финансии.
- Го повикувам министерот за правда да биде дел од нас, да успееме. Ја имаат мојата поддршка. Да ги решаваме проблемите. Сум на располагање, заедно можеме многу повеќе. Се надевам на резултати во скоро време. Дали ќе се успее, зависи од Министерството за финансии. Ги повикувам сите релевантни надлежни фактори, да пристапат кон решавање на оваа проблематика, бидејќи ќе има последици ако судството бојкотира. Да гледаме оптимистички, сега со ангажирање на медијатор, дека ќе се најде разбирање, подвлече претседателот на Судскиот совет.
Тој апелираше исто така и за нови вработувања во судството на испразнети места, не само по основ на пензионирање, туку и поради заминувања од најразлични, други причини.
На протестот беа побарани правата за достоинствена плата, поради, како што беше кажано, високиот степен на одговорност што го имаат службениците во судовите. Ќе продолжат протестите пред судовите од девет до десет часот, додека траат преговорите. бд/аа/
Фото: МИА