Вашингтон, 19 септември 2024 (МИА) - Американската полиција соопшти дека пронашла тело за кое се претпоставува дека е на мажот осомничен за пукањето и повредување на седум лица на магистрала во сојузната држава Кентаки на 7 септември.

Џозеф Коуч, 32-годишен поранешен резервист на армијата на САД, пукаше со полуавтоматска пушка, која легално ја купил утрото истиот ден, заедно со 1000 куршуми, соопштија властите.

Полицијата не изрази јавно претпоставки за мотивите на стрелецот, но текстуална порака испратена до неговата поранешна сопруга сугерира дека планирал самоубиство.

Тело кое одговара на описот на Коуч беше пронајдено во шума, потврди комесарот на полицијата во Кентаки, Филип Бурнет. Лични предмети кои укажуваат на Коуч и оружје беа пронајдени во близина.

Телото ќе биде испратено за идентификација во главниот град на државата, Франкфорт, изјави Бурнет.

Пред пукањето, Коуч ѝ испратил порака на својата поранешна сопруга, во која рекол дека планира да убие многу луѓе. ссм/

фото: архива