Скопје, 18 март 2026 (МИА) - Пратеници од Европски фронт предводен од ДУИ денеска во Собранието поднесле Предлог-резолуција за спроведување на Законот за употреба на јазиците во правосудниот испит, како иницијатива што произлегува од студентите по право, кои побараа правосудниот испит да го полагаат на албански јазик.

-И покрај фактот што студентите Албанци ги следат и ги завршуваат студиите на албански јазик на акредитирани универзитети во државата, ним им е оневозможено полагањето на правосудниот испит на нивниот мајчин јазик. Оваа состојба претставува директно прекршување на Законот за употреба на јазиците и го нарушува уставното начело на еднаквост пред законот, се вели во соопштението од Европски фронт. Резолуцијата поднесена во Собранието бара од надлежните институции – особено од Министерството за правда и Комисијата за правосуден испит – да преземат итни мерки за целосно и доследно спроведување на законот, обезбедувајќи организирање на испитот и на албански јазик.

Посочуваат дека правосудниот испит е професионален испит за проверка на правните знаења и не смее да се користи како дискриминаторски или ограничувачки механизам врз основа на јазик.

-Нецелосното спроведување на законот создава нееднаква и дискриминаторска состојба, ограничувајќи го еднаквиот пристап до правната професија за цела категорија студенти. Ваквата практика е неприфатлива во држава која тежнее кон владеење на правото и почитување на основните права. Преку оваа резолуција се бара институционална одговорност и конкретно дејствување, со цел да се гарантира еднаков третман и целосно почитување на јазичните права, во согласност со важечкото законодавство, се вели во соопштението.

Од Европски фронт посочуваат дека оваа иницијатива претставува важен чекор кон зајакнување на еднаквоста, правдата и функционирањето на правната држава. фф/са/

Фото: МИА Архива/Европски фронт