Скопје, 5 јуни 2020 (МИА) - Кошаркарскиот клуб Академија ФМП со нов тренер ќе ја започне наредната кошаркарска сезона 2020/21. Нов предводник на тимот од Кисела Вода е Александар Петровиќ, доаѓа од екипата на Куманово каде што ги помина последните три сезони. - Костурот на екипата ќе биде составен од перспективни млади играчи кои ќе имаат поддршка од квалитетни странски засилувања. Ќе се трудиме со тие млади играчи да постигнеме резултат и пред сѐ да се игра модерна кошарка и да бидеме конкурентна екипа, изјави Петровиќ за клупската веб-страница на Академија ФМП. Во досегашната тренерска кариера, Петровиќ бил на клупата на МЗТ Скопје, Карпош Соколи, Пелистер, Куманово и бил селектор на јуниорската репрезентација. Со ангажманот на Петровиќ, клубот сака да прерасне во еден стабилен прволигаш, да биде достоен противник на сите екипи и да го задржи костурот на домашни и странски играчи од минатата сезона. Претходната сезона клубот го водеа Гацов и Мирковски, на кои раководството на Академија ФМП им се заблагодарува за постигнатите резултати и им посакува успешна кариера. зс/