Нуредини: Императив е инвестирањето во зелена и одржлива енергија
- За да ја објасни важноста на инвестирањето во одржливата и зелената енергија, министерот за животна средина и просторно планирање на Северна Македонија Насер Нуредини за време на неговото уче
![Нуредини: Императив е инвестирањето во зелена и одржлива енергија](https://new.mia.mk/images/20221104194536_big_730x400_94.webp )
Атина, 11 септември 2020 (МИА) - За да ја објасни важноста на инвестирањето во одржливата и зелената енергија, министерот за животна средина и просторно планирање на Северна Македонија Насер Нуредини за време на неговото учество на Енергетски форум за Југоисточна Европа во Солун, направи споредба меѓу пандемијата и климатските промени, велејќи дека откако ќе се пронајде вакцина кризата со Ковид-19 ќе се надмине, но климатските промени се нешто за кое нема враќање назад, јави дописничката на МИА од Атина.
- Идејата дека треба повеќе да инвестираме во зелена и одржлива енергија е императив бидејќи колку одиме напред толку помали се можностите за враќање назад за климатските промени, затоа енергетскиот сектор е многу важен, истакна Нуредини, говорејќи за она што го научивме од пандемијата на Ковид-19.
Министерот Нуредини, заедно со неговите колеги од Грција и Романија, Костис Хаѕидакис и Николае Хаврилет, учествуваше на панел дискусијата под наслов „Југоисточна Европа: Енергетската соработка зад границите. Енергетската мапа на ЈИ Европа и иднината на Истмед“.
Нуредини рече дека во овој момент нашата земја има само еден извор за снабдување со гас, но работи на проширување на мрежата, додавајќи дека „гасот е клучен енергетски извор да одиме напред кон почиста енергија“. Тој ја истакна важноста на интерконекторот со Грција, објаснувајќи дека се завршени 90 проценти на југот од земјата и 75 отсто во западниот дел.
- Ние сме мала земја, го знаеме тоа, свесни сме за тоа и интерконекторот со Грција е многу важен за нас како земја. Во исто време планираме да се поврземе набргу и со Албанија, а очекуваме да го сториме истото и со Косово и секако и со Србија, што ќе создаде поголем обем за снабдување со гас за нашата земја. Тоа исто така ќе создаде и безбедност и независност за нас, со оглед на тоа дека сега имаме само еден извор на снабдување, објасни министерот за животна средина и просторно планирање.
Говорејќи за енергетските односи со Грција, Нуредини рече дека се одлични и изрази надеж за нивно дополнително развивање, како и надеж за изнаоѓање решение на спорот со „Хеленик петролеум“.
- Ние сме нова Влада, бевме влада три и пол години, повторно сме нова влада, ние веруваме дека направивме чекори напред за да имаме добри односи со сите наши соседи. Ова е коалиција која постојано бара решенија за прашањата што ги имаме, мислам дека решивме доста од прашањата, а едно што е отворено е со „Хеленик петролеум“, рече Нуредини и изрази надеж дека и за ова прашање ќе се најде решение.
На почетокот од излагањето министерот рече дека ова е второ негово гостување на енергетскиот форум, а од ланското учество, истакна дека за 12 месеци многу работи се смениле, освен пандемијата, го спомена и нашето членство во НАТО, зеленото светло за преговори со ЕУ, како и новата влада во Северна Македонија.
Министерот за животна средина и енергија на Грција, Костис Хаѕидакис, во неговото излагање го спомена интерконкеторот меѓу двете земји, истакна дека е од голема важност и изрази надеж дека набргу ќе се финализира.
Енергетскиот форум за Југоисточна Европа денеска се одржува во Солун и е хибриден со ограничен број учесници со физичко присуство, а меѓу малиот број беше и македонскиот министер.
Форумот е во организација на Американско-грчката трговска комора во соработка со Грчката асоцијација за енергетска економија, Атлантскиот совет и Трговската комора на САД. ср/сп/
![енергетски форум солун](/articles/images/nuredini-imperativ-e-investira-eto-vo-zelena-i-odrzhliva-energi-a/S6ugtDrdV/placeholder.webp?use_watermark=0)