Скопје, 14 јуни 2024 (МИА) – Вкупниот промет во индустријата во април годинава е намален за 7 отсто на годишно и за 11,6 отсто на месечно ниво, а за првите четири месеци од годинава е намален за 8,7 отсто во споредба со истиот период лани. При тоа, прометот во индустријата на домашниот пазар бележи зголемување за 8,7 отсто на годишно и за 1,2 отсто на месечно ниво, а во првите четири месеци од годинава е повисок за 2,3 отсто во споредба со лани. 

Прометот во индустријата на странските пазар, пак, е намален за 11 отсто на годишно ниво, за 15,4 отсто на месечно и за 11,5 отсто во првите четири месеци од годинава во споредба со истиот период од 2023 година.   

Според податоците на Државниот завод за статистика, вкупниот промет во индустријата во април 2024 година, во однос на април 2023 година, бележи пораст кај Интермедијарни производи, освен енергија за 7,8  отсто, Tрајни производи за широка потрошувачка за 5,9 и Нетрајни производи за широка потрошувачка за 6,7 отсто, додека опаѓање од 23,2 отсто има кај Капитални производи.

Прометот во индустријата на домашниот пазар во април 2024 година, во однос на април 2023 година, бележи пораст кај Интермедијарни производи, освен енергија за 13.4 отсто и Нетрајни производи за широка потрошувачка за 8,4 отсто, додека опаѓање има кај Капитални производи за 6,2 отсто и  кај Tрајни производи за широка потрошувачка за 7,5 отсто.

Прометот во индустријата, пак, на странските пазари во април 2024 година, во однос на април 2023 година има пораст кај Интермедијарни производи, освен енергија за 8,4 отсто, Tрајни производи за широка потрошувачка за 13 и Нетрајни производи за широка потрошувачка за 4,4  отсто, додека опаѓање има кај Капитални производи за 23,5 отсто.вј/са/

Фото: МИА архива