Скопје, 25 март 2026 (МИА) - Премиерот Христијан Мицкоски во телевизиско интервју најави дека ќе иницира регионална иницијатива за здружување за инвестиции во енергетиката која ќе има потенцијал од неколку милијарди евра. 

Мицкоски во емисијата „Заспиј ако можеш“ говореше за можноста регионот заеднички да настапува во поглед на привлекување на идните енергетски инвестиции за задоволување на доаѓачките потреби во светот. Премиерот потсети на последното негово учество во рамки на Светскиот eкономскиот форум во Давос. Тој посочи дека на една од панел дискусиите имал прилика заедно да учествува со Фатих Бирол, од Светската енергетска агенција, американскиот секретар за енергетика, првите луѓе на АЕС и АРАМКО, а главна тема на дискусијата биле енергетските предизвици во светот во иднина.

- Бирол посочи дека потребите за енергија во светот во следната деценија ќе растат, но потребите за електрична енергија ќе растат два и пол пати побрзо отколку вкупните потреби за енергија. Во следната деценија ќе недостасуваат околу 40.000 теравати инсталиран капацитет во светот. За да имаме чувство оваа бројка што значи, таа е моменталниот инсталиран капацитет на САД, Канада, ЕУ и Јапонија заедно. Толку ќе треба нов инсталиран капацитет во светот следнава деценија да се изгради - рече премиерот. 

Ако ние како држава, потенцира Мицкоски, се појавиме со иницијатива никој може нема да не препознае, но ако како регион Западен Балкан се појавиме, бидејќи далноводите и гасоводите немаат шенген правила, и да привлечеме само 0,1% од тие 40.000 тера вати да изградат тука такви капацитети, тоа се 4 тера вати.

- Цената на чинење на еден инсталиран мегават е 1 милион американски долари. Ние зборуваме за 4 милиони мегавати, помножено со 1 милион долари, ние зборуваме за 4 трилиони американски долари. Ако го поделиме тоа на 10 години, доаѓаме на 400 милијарди американски долари годишно. Вкупниот номинален БДП на сите шест балкански земји е 250 милијарди долари. А јас ви велам само 0.1% да успееме да ги донесеме од ова што ќе му треба на човештвото во следната деценија - објасни премиерот.
 
Мицкоски дополни дека разговарал со дел од своите колеги за оваа можност и најави дека за тоа сака да дискутира со сите земји од регионот на следниот состанок ЕУ - Западен Балкан во Подгорица и од тоа да произлезе регионална иницијатива.

- Предлог ми даде и министерот за надворешни работи и надворешна трговија, Тимчо Муцунски, да ја брендираме со име SECI (Skopje Еlectricity Connectivity Initiative), така да ја именуваме и тука да го направиме тој прв состанок, во кој сите ние ќе предложиме проекти, кои потоа ќе бидат дел од тој регионален пул на проекти коишто ние ќе го нудиме на странски инвеститори. Притоа да дефинираме приоритети, од наша страна овој е тимот, од албанска страна е друг тим, од српска е трет тим, црногорска, косовска, босанска, да формираме тимови и да се поделиме на различни центри во светот и да го претставиме тоа што ние го нудиме како регион во делот на инвестициите. Тоа е корисно и за Европа, но и ние како регион да покажеме политичка порака дека ние можеме да се обединиме за повисока цел и можеме заедно да работиме - заклучи Мицкоски. ев/вг/

ФОТО: Влада