Мбапе ќе го напушти ПСЖ на лето
- Суперѕвездата на Пари Сен Жермен, Килијан Мбапе му кажал на претседателот на клубот Насер Ал-Хелаифи дека сака да го напушти „Паркот на принцовите“ како слободен играч на лето, според сите водечки експерти за трансфери во Западна Европа
![Мбапе ќе го напушти ПСЖ на лето](https://new.mia.mk/images/20240215183459_big_730x400_28.webp )
Париз, 15 февруари 2024 (МИА) - Суперѕвездата на Пари Сен Жермен, Килијан Мбапе му кажал на претседателот на клубот Насер Ал-Хелаифи дека сака да го напушти „Паркот на принцовите“ како слободен играч на лето, според сите водечки експерти за трансфери во Западна Европа.
Како што е веќе познато, договорот на Мбапе со клубот е до крајот на оваа сезона, но со опција за продолжување за уште една, а за возврат играчот би добил огромна сума на пари во форма на плата и бонуси. Сепак, напаѓачот е решен конечно да го напушти ПСЖ по повеќегодишни шпекулации околу неговата иднина, одржувајќи го ветувањето кон Ал-Хелаифи дека тој ќе биде првиот што ќе дознае за неговиот избор дали да остане со францускиот шампион и следната сезона.
Не е јасно кој ќе биде следниот клуб на францускиот интернационалец, но најверојатно тоа е Реал Мадрид, кој во неколку наврати во минатото беше блиску до негов потпис. Сепак, пред да се впушти во својата нова авантура, Мбапе ќе има за цел да му ја донесе на ПСЖ дванаесеттата титула во Франција, како и првиот трофеј во Лигата на шампионите.
Досега оваа сезона, 25-годишниот играч има 31 гол и 7 асистенции на 31 натпревар во сите натпреварувања.дс
Фото: Архива