Париз, 14 декември 2025 (МИА) - Францускиот претседател Емануел Макрон вечерва изјави дека во телефонски разговор со неговиот украински колега Володимир Зеленски, рекол дека Франција ќе продолжи да ја поддржува Украина со цел да се постигне цврст и траен мир.

„Франција застана и ќе продолжи да стои покрај Украина со цел да се изгради цврст и траен мир способен да ја гарантира безбедноста и суверенитетот на Украина и Европа на долг рок. Им се заблагодарувам на сите преговарачи - украински, европски и американски - кои работат кон оваа цел“, напиша Макрон на платформата „X“.

Францускиот претседател рече дека штотуку разговарал со претседателот Зеленски. „Американците, Европејците и Украинците бараат мир. Додека Русија ја продолжува својата агресивна војна, Украина останува силна“, додаде тој.

Зеленски и неговата делегација се во Берлин вечерва и утре за да се обидат да ги убедат Вашингтон и Европа да ги отфрлат територијалните отстапки кон Русија во преговорите за прекин на војната во Украина. мс/

фото: ЕПА