Белград, 5 април 2023 (МИА) -  Специјалниот пратеник на ЕУ за дијалог меѓу Белград и Приштина, Мирослав Лајчак, објави дека разговарал со специјалниот советник на американскиот Стејт департмент, Дерек Шоле, за средбата со главните преговарачи на Белград и Приштина во Брисел, пренесе Бета.

Во објава на Твитер, Лајчак рече дека синоќа со Шоле се согласиле дека е потребно итно спроведување на договорите постигнати во дијалогот меѓу Белград и Приштина.

Лајчак во порака на Твитер напиша дека е добро да се разговара за последните случувања на Западен Балкан со специјалниот советник на Стејт департментот и дека го запознал со дијалогот и средбата на главните преговарачи.

„Се согласивме за потребата од итна имплементација со добра волја“, напиша Лајчак.

Главните преговарачи на Белград и Приштина, Петар Петковиќ и Бесник Бислими, вчера во Брисел се сретнаа со специјалниот претставник на ЕУ за дијалог, Мирослав Лајчак, во рамки на продолжението на дијалогот. паг/