Газа, 10 јули 2025 (МИА) - Директорот на Агенцијата на ОН за помош и работа за палестинските бегалци на Блискиот Исток (УНРВА), Филип Лазарини, денеска предупреди за израелски план за ново масовно раселување на Палестинците во бегалските кампови во близина на урнатините на Рафа.

Ова де факто би создало масовни концентрациони логори за Палестинците на границата со Египет, раселување одново и одново со генерации, рече тој во текст насловен „Втора Накба?“ објавен на неговиот профил на „X“.

Терминот Накба (катастрофа) се однесува на етничкото чистење на околу 700.000 Палестинци во 1948 година за време на создавањето на Државата Израел. Лазарини рече дека тоа исто така би ги лишило Палестинците од можноста за подобра иднина во нивната татковина.

-Не можеме да молчиме и да бидеме соучесници во такво масовно присилно раселување. Единствениот пат напред е траен прекин на огнот што вклучува ослободување на заложниците и континуирана, безбедна и достоинствена помош и вистинска посветеност на идно решение за две држави, рече шефот на УНРВА.

Порано оваа недела, израелскиот министер за одбрана Израел Кац објави план за преместување на до 600.000 Палестинци од Газа во одредена „хуманитарна зона“ во урнатините на јужниот град Рафа.

Пристапот до кампот ќе биде предмет на строги безбедносни проверки за да се осигури дека оперативците на Хамас нема да влезат. Тој рече дека израелската војска ќе ја затвори областа и дека на Палестинците нема да им биде дозволено да заминат, а планот на крајот ќе ги смести сите 2,1 милиони Палестинци што моментално живеат во Појасот Газа. мс/

фото: ЕПА архива